Hang Ghimau : Mukadimah

Ini namo dio Hang Ghimau(Rimau). Dio ni pun superhiro gak macam batman, spederman dan lain-lain man cumo dio ni , hero kito ,orang kito ,budayo kito. Namo pun lotak Hang Rimau bososuaian dongan budayo kito ala.. cam Hang Tuah and the geng. Kalau lotak Tiger Man dah macam hero omputeh. Biar lah omputeh ngan hiro dio kito ngan hiro kito baghu nampak bezo'eh.

Dio ni pun jadi hiro pasal kono baham ngan ghimau alah macam spedermen kono gigit lelabah lah lobih kughang cam tu gak. Bilo dah kono baham ngan ghimau baghu dio jadi hiro. Polik bunyi'eh patut eh kalau kono baham dek ghimau dah tontu jadi arwah ni camno buleh jadi hiro lak, ontahlah den pun tak tau.

Inilah dio ghimau yang bertanggung jawab





Ini pulak budak eh yg kono baham dek ghimau tu. Namo dio Herman.

Dio ni ejen insuran, ontah macam mano satu hari tu sodang dio asyik memujuk tokey sarkis memboli insuran eh , tetibo ajo ghimau sarkis yang seramai 5 ekor terlopeh dari kandang' eh torush mombaham budak ni.

Sebonar eh ghimau sarkis tu alergik dongan insuran ni ,tu pasal lah diokor mengamuk ,mano tak eh dah 20 tahun bergolumang dongan sarkis sepolisi insuran pun tak pornah diboghi oleh tokey sarkis tersobut.

Nak dijadikan cito ghimau borlimo ni baghu lopeh lunch, jadi semaso lunch ontah apo silap eh, si penjago ghimau tolah tobagi daghing yang tolah tercomar dongan bahan kimia yang secaro tak sengajo tortumpah semaso beliau menyediokan daging torsobut.

Dalam ertikata lain atau dalam bahasa yang mudah difahami budak ejen insuran ni telah dibaham oleh harimau yang dicemari bahan kimia . Dongan sobab itulah dio pun pun jadi Hang Rimau. Camtulah kurang lebih cito dio.




Kalau ado hiro dah tontu ado heroin eh. Ha yg ni lah heroin dio. namo eh Jenab .

Dio soghang sales girl yang komited dongan kojonyo. Kojonyo monjual ajo ,ado jo bondo nak di jual eh dari selipar gotah sampai pokok gotah sumo di jualnyo.

Yang polik eh oghang mesti boli apo yang dijual eh. Dio jumpo Herman mulo-mulo dulu pun pasal dio sughuh Herman boli kerepek yang dijualnyo.

Hah elok ejen insuran jumpa sales girl, baeknya partner ship. Sojak dari tu dioghang selalu berduo buek sales. Tu yg buleh jadi kapel tu.





Bilo dah ado hiro dan hiroin dah tontu kono ado oghang jahat eh atau kato oghang minang Villainnyo. Hah inilah dio oghangnyo .Namo dio Dregondol.

Dio ni dulu ambik banyak insuran tapi ontah macam mano satu hari tu dio eksiden ,dio kono langgar ngan lori tangki minyak sampai terbakar muko dio dan terus takde muko dio.

Bilo nak claim insuran , sumo kampeni insuran tak cayo yang dio adalah orang nyo pasal dah tak buleh cam dah muko dio, nak cop jari pun jari dah habeh rontung. Jadi sumo kampeni insuran rejek claim dio.

Itu yang dio anti ngan insuran ni. Pasal tu lah dio bonci ngan Hang Rimau pasal Herman dulu adalah ejen insuran dio. Sojak dari eksiden tu dio buleh lak kuarkan api dari mulut eh, tergolak kuar api, terberosin kuar api, tersodak kuar api, berdongkur pun kuar api.

Muko dio pun ntah apo ghoman eh pasal dah habis rontung tu pasal yang dio pakai topeng nago tu . Jadi modus operandinyo memusnahkan segalo bondo yang tolah diinsurankan tomasuklah ngan ejen insuran sekali.



To be Continueee yeeee


Apo nak tuligh lagi ni? takdo pulak ilham'eh, caghi ilham dulu baru buleh tuligh , tapi nak cari ilham kek mano? Ado tak sapo2 nampak ilham, kalau terjumpo ko, terserompak ko tulung bagi tahu dio surugh jumpo den, den tongah takdo ilham ni. Eh laa.. banyak juo patah eii dah den taipkan, dlm takdo ilham tu dah berbaghih -baghih den taip'an. Apo namo lah yang den ngepet'an ni, sengsorang lak tu nak kato gilo ghaso'eh masih siuman, nak kato siuman cakap sengsorang, ah kok dek kau lah nak kobar'an den ni gilo ko apo ko, yang ponting'eh den hepi jadi den. Adios lawargutu kumuesta pontos arigos carinio mio ontah apo ntah maksud'eh den pun tak paham...